प्रेग्नेंसीमध्ये गाजर खाताय? मग ‘ही’ माहिती जाणून घ्याच!

प्रेग्नेंसीमध्ये असताना आपल्या व बाळाच्या निरोगी व सुदृढ आरोग्यासाठी प्रत्येक स्त्री सजग होते व विविध पदार्थांचा आहारात समावेश करते. प्रेग्नेंसीमध्ये अनेक गोष्टींची काळजी घ्यावी लागते. त्यातील सर्वात खास लक्ष द्यावे लागते ते म्हणजे आहारावर! कारण आईच्या आहारातूनच बाळाला पोषण मिळतं. म्हणून तुमच्या मनात आहाराविषयी काही साशंकता असेल की प्रेग्नेंसीमध्ये गाजर खाण्याचे लाभ आहेत का व असतील तर ते काय? तर हा लेख जरुर वाचा.
 
गरोदरपणात (pregnancy tips) स्त्रीचा आहार हाच तिचा आधार असतो. स्त्री जेवढा उत्तम आहार (pregnancy healthy diet) घेईल तेवढा फायदा तिला व तिच्या शरीराला होतो. पण अनेकदा स्त्रिया या गोष्टीकडे दुर्लक्ष करतात आणि त्याची मोठी किंमत त्यांना आणि बाळाला भोगावी लागते. त्यामुळेच स्त्रीने या काळात अतिशय काळजीपूर्वक आहाराची निवड केली पाहिजे आणि त्यात अशाच पदार्थांचा समावेश केला पाहिजे ज्याचा शरीराला फायदा होईल आणि त्या पदार्थाने शरीराला पोषण मिळेल.

आज आम्ही तुम्हाला अशाच एका पदार्थाबद्दल सांगणार आहोत ज्याच्या सेवनाने खुप पोषक तत्वे मिळतील आणि आई व बाळ दोघांना फायदा होईल. तो पदार्थ म्हणजे गाजर (carrot) होय. गरोदरपणात गाजर खाल्ल्याने आई व बाळ यांच्या शारीरिक स्थितीत चांगली सुधारणा होते.
गाजरातील पोषक तत्वे

100 ग्रॅम गाजरात कॅलरी, कार्बोहाइड्रेट 9.58 ग्रॅम, प्रोटीन 0.93 ग्रॅम, फायबर, 2.8 ग्रॅम, फॅट 0.24 ग्रॅम, साखर 4.5 ग्रॅम, विटामिन ए 5 मिग्रा, व्हिटॅमिन सी 6 मिग्रा, व्हिटॅमिन बी 60.135 ग्रॅम, व्हिटॅमिन के 13.2 मिग्रा, सेलेनियम 11 मिग्रा, मॅगनीज 0.143 मिग्रा, कॉपर 0.045 मिग्रा, पोटेशियम 320 मिग्रा, सोडियम 69 मिग्रा, कॅल्शियम 33 मिग्रा, आयरन 0.3 मिग्रॅ, मॅग्नीशियम 12 मिग्रॅ, झिंक 0.24 मिग्रॅ आणि फास्फोरस 35 मिग्रॅ प्रमाणात असते.

गरोदरपणात गाजर खाण्याचे फायदे
गाजरात अनेक प्रकारचे व्हिटॅमिन आणि मोठ्या प्रमाणात मिनरल्स असतात. हे असे कंदमुळ आहे त्याचा मागचा आणि पुढचा दोन्ही भाग खाता येतो. गाजर हे व्हिटॅमिन 'ए' चा चांगला स्रोत आहे. त्यामुळे गाजर खाणे डोळ्यांसाठी चांगले असल्याचे म्हटले जाते. गाजर खाल्ल्याने बाळाची दृष्टी चांगली होते. गाजरात मोठ्या प्रमाणावर व्हिटॅमिन 'सी' असते जे रोगप्रतिकारक शक्ती चांगली राखण्यासाठी मदत करते. यातील कॅल्शियम, व्हिटॅमिन 'ए' आणि बीटा कॅरोटीन बाळाच्या शारीरिक विकासात हातभार लावतात. गाजराचे सेवस एनिमियाचा धोका सुद्धा कमी करते. कारण यात लोह आणि व्हिटॅमिन 'सी' मोठ्या प्रमाणात असते.

इतर फायदे
गरोदरपणात स्त्रीला बद्धकोष्ठतेची समस्या अनेकदा सतावते. मात्र अशावेळी गाजर खाल्ल्यास ही समस्या दूर होऊ शकते. गाजरात फायबर असल्याने बद्धकोष्ठतेची समस्या दूर होते. याशिवाय गाजरात फॉस्फरस असते जे स्नायूंवरचा दबाव दूर करते. गाजर खाल्ल्याने गरोदरपणात होणारी उच्च रक्तदाबाची समस्या सुद्धा नियंत्रणात येते. गाजरात मॅगनीज असते जे बाळाच्या हाडांच्या आणि कार्टीलेजच्या निर्माणासाठी आवश्यक मानले जाते. गाजरात पुरेशा प्रमाणात व्हिटॅमिन 'बी' आणि फॉलिक ऍसिड असते जे बाळाच्या तंतू पेशी आणि मेंदूच्या विकासासाठी महत्त्वपूर्ण कार्य करते. या व्यतिरिक्त बाळात स्पाईना बिफिडा सारखे जन्मजात रोग निर्माण होऊ देत नाही.

गाजर खाण्याचे दुष्परिणाम
आपण वर गाजराचे फायदे पाहिले आता त्यामुळे होणारे नुकसान सुद्धा पाहू. कोणत्याही पदार्थाचे फायदे आणि नुकसान दोन्हीही असतात आणि दोन्ही माहीत असणे गरजेचे असते. गाजरात केरोटीन नामक पदार्थ असतो. ज्याचे अधिक प्रमाणात सेवन करणे त्वचेसाठी हानिकारक ठरते. जर गाजराचे अधिक प्रमाणात सेवन केले गेले तर व्हिटॅमिन 'ए' ची शरीरातील मात्रा वाढते आणि हे वाढलेले प्रमाण बाळासाठी अजिबात चांगले नसते. गाजराचे जास्त सेवन केल्याने मळमळ होते आणि उलटी देखील होऊ शकते. गाजराचा ज्यूस जास्त प्रमाणात प्यायल्याने गरोदरपणात डोकेदुखी वाढू शकते आणि सतत सुस्ती येऊ शकते.

तुम्ही गाजराचे सेवन करावे का?
हो गरोदरपणात गाजराचे सेवन करावे पण मर्यादित प्रमाणात करावे. जर तुम्ही जास्त प्रमाणात सेवन केले तर तुम्हाला त्याचे परिणाम हे भोगावेच लागतील. त्यामुळे जाणकारांकडून माहिती घेऊनच गाजराचे सेवन करावे. शक्य असल्यास डॉक्टरांचाही सल्ला घ्यावा. जर गाजराच्या सेवनानंतर काही शारीरिक समस्या सुरू झाल्या तर मात्र त्वरित गाजराचे सेवन थांबवावे. गाजर तुमच्या शरीराला मानवत नसावे. अशावेळी काहीही माहिती नसताना वा दुर्लक्ष करून गाजराचे सेवन करणे तुमच्या शरीराला आणि बाळाच्या आरोग्याला सुद्धा धोका पोहचवू शकते.