प्रेग्नेंसीमध्ये किती तास झोप घेणं आवश्यक असतं?

प्रेग्नेंसीच्या ९ महिन्यात संपूर्ण आराम घेणं किंवा पर्याप्त झोप घेणं गरजेचं असतं पण दुस-या तिमाहीत या गोष्टीची जास्त काळजी घ्यावी. कारण प्रेग्नेंसीच्या तिस-या तिमाहीत प्रचंड शारीरिक व मानसिक थकवा येतो. त्यामुळे हा थकवा येण्याआधीच भरपूर झोप घेऊन एनर्जी राखून ठेवणं अत्यंत आवश्यक असतं.

गरोदरपणाचा काळ हा अत्यंत नाजूक असतो म्हणून या काळात स्त्रीने शक्य तितका आराम करायला हवा, जर स्त्रीला योग्य आराम मिळाला तर त्याचा चांगला फायदा आरोग्यावर दिसून येईल, जर योग्य आराम मिळाला नाही तर त्याचे दुष्परिणाम भोगावे लागू शकतात. मात्र अनेक स्त्रियांना नेमकी किती झोप गरोदरपणात घ्यावी हे माहित नसते. तर दुसरीकडे अशा स्त्रियांचा गट असतो ज्यांना त्यांच्या डॉक्टर कडून या गोष्टी समजावून सांगितल्या जातात. अशाच स्त्रियांमध्ये बॉलीवूडच्या अभिनेत्री सुद्धा मोडतात.

यांच्या दिमतीला खाजगी डॉक्टर असतात जे त्यांना योग्य माहिती वेळोवेळी पुरवत असतात. बॉलीवूड मधील दोन अभिनेत्री अनुष्का शर्मा (anushka sharma) आणि करीना कपूर (kareena kapoor) सध्या गरोदर आहेत आणि त्यांनी या काळात खासकरून गरोदरपणाच्या दुसऱ्या तिमाहीमध्ये किती आराम करावा, किती झोप घ्यावी हे त्यांच्या डॉक्टरकडून त्यांना सांगण्यात आले आहे आणि तीच माहिती आम्ही तुमच्या समोर उलगडत आहोत जेणेकरून सामान्य स्त्रियांना सुद्धा यांचा फायदा व्हावा आणि दुसऱ्या तिमाहीच्या नाजूक काळात किती झोप घ्यावी हे त्यांना सुद्धा कळावं.
सेकंड ट्राइमेस्‍टरमध्ये झोप

अनके स्त्रियांना सेकंड ट्राइमेस्‍टर अर्थात दुसऱ्या तिमाहीच्या काळात जास्त चांगली झोप येते कारण या काळात मॉर्निंग सिकनेसचा त्रास सतावत नाही ना ही बेबी बंप इतका वाढलेला असतो की झोपताना काही त्रास होईल. मात्र गरोदरपणाच्या तिसऱ्या तिमाहीमध्ये जास्त थकवा जाणवू शकतो म्हणून दुसऱ्या तिमाहीमध्ये शक्य तितकी झोप घेण्याचा प्रयत्न करावा आणि आपली एनर्जी येणाऱ्या महिन्यांसाठी वाचवून ठेवावी. अनेक डॉक्टर सुद्धा गरोदर स्त्रियांना हाच सल्ला देतात आणि ज्याचा खूप चांगला परिणाम स्त्रीला दिसून येतो.

किती तास झोप घ्यावी?
दुसऱ्या तिमाहीचा काळ हा गरोदरपणातील एक महत्त्वाचा काळ मनाला जातो आणि या काळात गरोदर स्त्रीने किमान 7.5 तास झोप घेणे गरजेचे आहे. या वेळेचा स्त्रीने योग्य प्रकारे वापर करायला हवा. येणारे तीन महिने या काळापेक्षा अधिक कठीण असणार असतात म्हणून आपली उर्जा आणि झोप वाचवून ठेवावी. या काळात घरच्यांनी सुद्धा स्त्रीला शक्य तितके सहकार्य करून किमान साडे सात तासाची झोप तिला मिळेल याची काळजी घ्यावी. या काळात तिला कोणतेही जड वा मेहनतीचे काम करायला देऊ नये. तिला शक्य तितका आराम देण्यावर भर द्यावा.

झोप का महत्त्वाची आहे?
विज्ञान सुद्धा सांगतं की जर तुम्हाला वाटतं की तुमच्या शरीराने योग्य प्रकारे काम करावं तर तुम्ही शरीराला पर्याप्त झोप द्यायला हवी. जो व्यक्ती कमी झोप घेतो तो कधीच उत्साही राहत नाही आणि त्याला विविध शारीरक समस्यांना तोंड द्यावे लागते. हीच गोष्ट गरोदर स्त्रीला सुद्धा लागू होते. ती या काळात जितकी झोप घेईल तेवढी ती निरोगी राहील. यामुळे शरीरातील उर्जा स्टोअर होते आणी शारीरिक कार्ये चांगली होतात. जर झोप पूर्ण नाही झाली तर ताण-तणाव, आळस सतावतो. म्हणूनच गरोदर स्त्रीने सर्वाधिक झोप घेण्यावर भर द्यावा आणि निरोगी रहावे.

पूर्ण झोप घेण्याचे फायदे
गरोदरपणात योग्य झोप घेण्याचे काही फायदे आहेत. एका संशोधनात हे दिसून आले आहे की ज्या स्त्रिया गरोदरपणाच्या शेवटच्या महिन्यांमध्ये रात्री सहा तासांपेक्षा कमी झोप घेतात त्यांची प्रसूती जास्त वेळ चालते आणि त्यांच्यात सिझेरियन डिलिव्हरीचा धोका 4.5 पट जास्त असतो. या शिवाय ज्या स्त्रियांची सारखी झोपमोड होते त्यांच्यात सुद्धा हाच धोका दिसून आला. त्यामुळे सहसा स्त्रीने पूर्ण झोप घेणेच उत्तम आहे. यामुळे प्रसूती लवकर होते आणि सिझेरियन डिलिव्हरीचा धोका राहत नाही.

कशी घ्यावी चांगली झोप?
योग, मेडीटेशन यांच्या मदतीने गरोदर स्त्री अनिद्रे पासून सुटका मिळवू शकते. जर स्त्रीला झोप येत नसेल तर तिने गरोदरपणातील खास स्लीपिंग पोझिशन बद्दल आपल्या डॉक्टरकडून माहिती घ्यावी आणि त्यांच्या सल्ल्यानेच विविध पोझिशन्स ट्राय कराव्यात. स्वत:हून कोणत्याही स्थितीमध्ये झोपू नये. गरोदर स्त्रीसाठी तीच स्थिती योग्य असते जी तिच्यासाठी आणि बाळासाठी योग्य असेल व दोघांनाही त्या स्थितीमध्ये कोणता त्रास होणार नाही. आपल्या आहारात सुद्धा डॉक्टरांच्या सल्ल्याने बदल करावा कारण आहार सुद्धा चांगली झोप येण्यामध्ये महत्त्वाची भूमिका बजावू शकतो.