डोहाळे कधी लागतात?

गर्भावस्थेतील प्रत्येक स्त्रीला डोहाळे लागतातच आणि ते पुरवणे म्हणजे कुटुंबीयांसाठी एक पर्वणीच असते जणू! पण हे डोहाळे कोणत्या महिन्यापासून सुरु होतात ते इथे जाणून घ्या!
गरोदरपणात स्त्रीचे सगळ्यात जास्त लाड होतात तिच्या डोहाळपणात! डोहाळपण म्हणजे एक अशी स्थिती ज्यात गरोदर स्त्रीला काही न काही खायची इच्छा होते. आंबट, गोड, खारट काहीही! या स्थितीत त्यांना अशा गोष्टी सुद्धा खाण्याचं मन करतं ज्या त्यांना बिलकुल आवडत नाहीत. गरोदर स्त्रीला डोहाळे लागणे हि एक सामान्य गोष्ट आहे, त्यात अजिबात काही विचित्र नाही. प्रत्येक स्त्रीला निसर्गतःच डोहाळे लागतात. पण हे डोहाळे का लागतात? कधीपासून सुरु होतात हि गोष्ट गरोदर स्त्रियांप्रमाणे तिच्या सोबत असणाऱ्या लोकांना, किंबहुना प्रत्येकालाच माहित असायला हवी. म्हणून आज आम्ही तुम्हाला अगदी सोप्या भाषेत हा नक्की काय प्रकार आहे हे सांगणार आहोत. जेणेकरून तुम्ही गरोदर स्त्रीला डोहाळे आले कि तिच्या आवडी निवडी योग्य पद्धतीने समजून घेऊन पूर्ण करू शकता. चला जाणून घेऊया.
डोहाळे म्हणजे काय?

एका संशोधनानुसार, ५० ते ९० टक्के स्त्रियांना गर्भावस्थेमध्ये काही विशिष्ट पदार्थ खाण्याचे डोहाळे लागतात. गरोदरपणात होणाऱ्या हार्मोन्स मधील बदलांमुळे हे होत असतं. वारंवार हार्मोन्स मध्ये येणाऱ्या बदलांमुळे चव आणि वास घेण्याच्या शक्तीवर परिणाम होतो. यामध्ये त्यांना न आवडणाऱ्या चवी व वास त्यांना आकर्षित करू शकता आणि यातूनच त्यांची जी काहीही खाण्याची इच्छा निर्माण होते त्यालाच म्हणतात डोहाळे! आता तुमच्याही लक्षात आलं असेल कि हि एक नैसर्गिक प्रक्रिया आहे. त्यात काही वावगं नाही.
गरोदरपणात कधी सुरु होतात डोहाळे?

सामान्यतः स्त्रियांना गरोदरपणाच्या पहिल्या तिमाही मध्ये डोहाळे लागतात आणि दुसऱ्या तिमाही हे डोहाळे अधिक वाढतात आणि पुन्हा तिसऱ्या तिमाहीत हे डोहाळे कमी होतात. डॉक्टरांचं असं म्हणणं आहे की काही स्त्रियांना डोहाळे हे डिलिव्हरी नंतरही लागतात. काही स्त्रियांना एकाच वेळी विविध पदार्थ खाण्याची इच्छा होते,तर काही स्त्रियांना एका दिवशी काही वेगळी गोष्ट खावीशी वाटते तर दुसऱ्या दिवशी अजून काही वेगळी गोष्ट खावीशी वाटते. ह्या डोहाळे वर कोणाचंच नियंत्रण नसतं म्हणून हे डोहाळे वेळोवेळी पुरवणंच योग्य!
कोणते पदार्थ खाण्याचे डोहाळे लागतात?

डोहाळे लागल्यावर गरोदर स्त्रीला काय खावंस वाटेल हे कोणीही सांगू शकत नाही. ती मध्येच कधीही आपली इच्छा व्यक्त करू शकते. तरी काही असे सामान्य पदार्थ आहेत जे सर्वच स्त्रिया मागतात. आईसक्रिम, चॉकलेट यांसारखे गोड पदार्थ, चीज, स्टार्कयुक्त कार्बोहाइड्रेट पदार्थ, फळे, भाज्या, फास्टफूड किंवा चमचमीत चायनीजचाही यात समावेश असतो. जास्तीत जास्त गरोदर स्त्रीया ह्या आंबट खायला मागतात. चिंच, कैरी यांसारखे पदार्थ!