गरोदरपणात नारळाचे पाणी कधी प्यावे?

प्रेग्नेंसीमध्ये नारळ पाणी कधी प्यावं? जाणून घ्या बाळाला होणारे फायदे :

गरोदरपणातील (Pregnancy) काळ अतिशय नाजूक असतो. आई आणि गर्भातील (Fetus) बाळाचं आरोग्य निरोगी राहावं, यासाठी भरपूर प्रमाणात पोषक आहार (Pregnancy Diet) घेण्याचा सल्ला डॉक्टरांकडून दिला जातो. नारळ पाणी(Coconut Water) हे स्त्रियांसाठी अतिशय आरोग्यदायी मानलं जातं. पण नारळ पाणी पिण्याचे जसे फायदे आहेत, तसे दुष्परिणाम देखील (Coconut Water Side Effects) आहेत. त्यामुळे गर्भावस्थेत असताना नारळ पाणी प्यावे की पिऊ नये? असा प्रश्न अनेकींच्या मनात असतो. नारळ पाण्यामध्ये शरीरास आवश्यक असणारी पोषकतत्त्वं भरपूर प्रमाणात आहेत. पण तरीही गरोदरपणात नारळ पाण्याचं सेवन करण्यापूर्वी काही महत्त्वपूर्ण गोष्टी जाणून घेणं आवश्यक आहे. प्रेग्नेंसीमध्ये नारळ पाणी प्यायला पाहिजे की पिऊ नये? नारळ पाणी पिण्याचे फायदे कोणते?

​नारळ पाण्यातील पोषकतत्त्वे

एक कप नारळ पाण्यात म्हणजे 240 मि.ली नारळ पाण्यामध्ये 46 कॅलोरी- 9 ग्रॅम कार्ब (Dietary Carbohydrate - कर्बोदके), 3 ग्रॅम फायबर आणि 2 ग्रॅम प्रोटीन असतात. याव्यतिरिक्त नियमित नारळ पाणी प्यायल्यास तुम्हाला 10 टक्के व्हिटॅमिन सी, 15 टक्के मॅग्‍नेशियम, 17 टक्के मॅगनी, 17 टक्के पोटॅशियम, 11 टक्के सोडियम आणि 6 टक्के कॅल्शिअयचा शरीराला पुरवठा होतो. गर्भधारणेव्यतिरिक्त तुम्ही सकाळी रिकाम्या पोटी नारळाचं पाणी पिण्याचे भरपूर फायदे मिळतात. तुमच्या शरीराला नवीन ऊर्जा मिळते आणि गॅस-अ‍ॅसिडिटीच्या समस्याही निर्माण होत नाही.

गर्भावस्थेत नारळ पाणी पिण्याचे लाभ

नारळ पाण्यामध्ये निसर्गतः राइबोफ्लेविन, कॅल्शियम, मॅग्नेशियम आणि व्हिटॅमिन सी हे घटक मुबलक प्रमाणात आहेत. त्यामुळे गर्भावस्थेत नारळाचं पाणी प्यायल्यास त्याचे अनेक आरोग्यदायी लाभ मिळतात, असे कोकोनट डेव्हलपमेंट बोर्डचं म्हणणं आहे.
संशोधनाद्वारे समोर आलेल्या माहितीनुसार, गर्भावस्थेदरम्यान नारळ पाणी प्यायल्यास शरीराची रोगप्रतिकारशक्ती वाढते. किडनीची कार्य प्रणाली देखील सुधारते. तसंच आणि मूत्रमार्गातील संसर्ग देखील रोखला जातो. तसेच उच्च रक्तदाबाचा त्रास कमी होण्यासही मदत होते.
गर्भावस्थेत नारळ पाणी प्यायल्यास छातीमध्ये जळजळ होण्याच्या त्रासातून सुटका मिळते.
नारळ पाण्यामुळे गरोदरपणात येणाऱ्या थकव्यापासून आराम मिळतो.
गर्भावस्थेत बद्धकोष्ठतेचा त्रास होणे ही सामान्य बाब आहे. पण नारळ पाणी प्यायल्यास बद्धकोष्ठतेचा त्रास कमी होतो.
नारळ पाण्यामध्ये कॅलरी नसतात. यामध्ये ओमेगा 3 फॅटी अ‍ॅसिड आणि फायबरचं प्रमाण जास्त आहे. नारळ पाण्यातील या घटकांमुळे प्रेग्नेंसीमध्ये महिलांचं वजन नियंत्रणात राहण्यास मदत होते.

गर्भावस्थेत नारळ पाणी कधी प्यायला हवं?

महिलांना प्रेग्नेंसीच्या पहिल्या महिन्यातच सकाळी उठल्यानंतर साधारणतः आजारपण आल्यासारखं आणि थकवा जाणवतो. अशा वेळेस नारळ पाण्याचे सेवन करणं सर्वाधिक फायदेशीर ठरेल. म्हणजे दुपारी 12 वाजण्यापूर्वी नारळ पाण्याचं सेवन करावं. दुपारी 12 वाजेनंतर नारळ पाणी पिऊ नये. तिसऱ्या महिन्यात गर्भाच्या मेंदूचा विकास होण्यास सुरुवात होते. या काळात पोषकतत्त्वांचा शरीराला पुरवठा होण्याची सर्वाधिक आवश्यकता असते. नारळाच्या पाण्यातून आई आणि बाळ दोघांनाही पोषकत्त्व मिळतात.

​प्रेग्नेंसीमध्ये किती प्रमाणात प्यावं नारळ?

गर्भावस्थेत असताना महिलांनी स्वतः आणि त्यांच्या कुटुंबीयांनी छोट्यातील छोट्या गोष्टींची काळजी गरजेचं आहे. नारळ पाणी पिणे आरोग्यासासाठी फायदेशीरच आहे. पण गरोदरपणात नारळ पाणी पिण्याचा अतिरेक केल्यास याचे दुष्परिणाम होण्याची भीती अधिक आहे. गर्भावस्थेत नियमित केवळ एक ग्लास नारळ पाणी पिणे आरोग्यासाठी योग्य आहे. पण जर तुम्ही आवश्यकतेहून अधिक प्रमाणात नारळाचं पाणी प्यायल्यास तुम्हाला आणि गर्भाला फायदा होण्याऐवजी नुकसान होण्याची शक्यता आहे.

​शहाळ्याचंच पाणी प्यावं, कारण :

नियमित एक ग्लास नारळाच्या पाण्यातून गर्भवती महिलेला आवश्यक असलेल्या पोषकत्त्वांचा पुरवठा होतो. महत्त्वाचे म्हणजे प्रेग्नेंसीदरम्यान महिलांना केवळ शहाळ्यातीलच पाणी प्यावं. जेवणासाठी वापरल्या जाणाऱ्या नारळातील पाणी प्यायल्यास बद्धकोष्ठतेची समस्या निर्माण होऊ शकते. पण एखाद्या महिलेला नारळ पाण्याची चव पसंत नसल्यास तिला मनाविरोधात पाणी पिण्याची सक्ती करू नका. मर्यादित प्रमाणातच नारळ पाण्याचे सेवन केल्यास गर्भवती महिला आणि गर्भाला लाभ मिळतील. कोणत्याही पदार्थांचं अतिरिक्त सेवन केल्यास फायदा होण्याऐवजी त्याचे तोटे अधिक सहन करावे लागतात, ही बाब लक्षात ठेवा.