मुलगा गोरा होण्यासाठी काय करावे?

बाळाची त्वचा दिसेल सुंदर आणि नितळ, करा ‘हे’ घरगुती उपाय

आपल्या बाळाची त्वचा सुंदर आणि नितळ व्हावी, यासाठी तुम्ही देखील उपाय शोधत आहात. यासाठी महागडे बेबी स्किन केअर प्रोडक्ट्सवर पाण्यासारखा खर्च करण्याची आवश्यकता नाही. काही घरगुती उपचार केल्यास तुमच्या बाळाचीही त्वचा मऊ, सुंदर आणि नितळ होण्यास मदत होईल.

मुले म्हणजे देवाघरची फुले ! बालपण अतिशय गोंडस आणि निरागस असते. आपलं बाळ जसे आहे तसे आपण त्याचा स्वीकार केला पाहिजे. त्याचप्रमाणे मुलांच्या त्वचेच्या रंगामुळेही फरक पडता कामा नये. तुमच्या मुलाच्या त्वचेचा रंग त्याच्या जीनवर (जन्मतः असलेली जनुके किंवा गुणसूत्र) आधारित असतो. त्यामुळे बाळाच्या जन्मानंतर आपण त्याच्या नैसर्गिक रंगामध्ये काही बदल करू शकतो, अशी कोणतीही उपचार पद्धत उपलब्ध नाही. पण काही घरगुती उपचार करून तुम्ही बाळाच्या त्वचेचं आरोग्य सुधारण्याचा प्रयत्न करू शकता. यामुळे बाळाची त्वचा सुंदर, नितळ आणि तजेलदार राहण्यास तुम्हाला मदत मिळेल. पण यासाठी बाजारात जाऊन महागडे क्रीम किंवा लोशन विकत घेण्याची काहीही आवश्यकता नाही. केमिकलयुक्त प्रोडक्ट वापरल्यास बाळाच्या नाजूक त्वचेवर दुष्परिणाम होऊ शकतो. बाळाची त्वचा सुंदर आणि नितळ व्हावी, अशी इच्छा असल्यास घरगुती उपचार करा.

बेसन पेस्ट
बाळाची त्वचा सुंदर आणि नितळ व्हावी, यासाठी तुम्ही चण्याच्या पीठ (बेसन) वापरू शकता. बेसन पिठामध्ये हळद, कच्चे दूध, ताज्या दुधाची मलई एकत्र करून मिश्रण तयार करा. बाळाला आंघोळ घालण्यापूर्वी ही पेस्ट त्याच्या संपूर्ण शरीरावर १० मिनिटांपर्यंत लावून ठेवा. यानंतर बाळाला कोमट पाण्यानं आंघोळ घाला. या पेस्टमुळे बाळाची त्वचेवर नैसर्गिक चमक येईल. साधारणतः बाळाच्या त्वचेवर लव (lanugo) कमी करण्यासाठी चण्याचे पीठ लावले जातेच.
​बाळासाठी सौम्य बॉडी पॅक

बॉडी मास्क बाळाच्या त्वचेचं आरोग्य सुधारण्याचे कार्य करते. यामुळे त्वचेचा संसर्ग होण्याचाही धोका कमी होतो. बॉडी पॅकसाठी तुम्ही चंदन, हळद आणि केसरचा वापर करू शकता.

सामग्री

एक मोठा चमचा हळद

एक मोठा चमचा चंदन

एक मोठा चमचा केसर

बॉडी पॅक तयार करण्याचा विधि :

केसर, चंदन आणि हळद एकत्र करून त्यामध्ये दोन मोठे चमचे दूध मिक्स करावे. ही पेस्ट बाळाच्या त्वचेवर लावा. १५ मिनिटांसाठी बाळाच्या त्वचेवर ही पेस्ट लावून ठेवा. त्यानंतर बाळाला कोमट पाण्यानं आंघोळ घाला. साधारणतः बाळाच्या आंघोळीपूर्वीच बॉडी पॅक लावल्यास त्याचं अंग स्वच्छ करण्यास तुम्हाला सोपे जाईल. विशेष म्हणजे कोणतंही बॉडी पॅक किंवा पेस्ट लावताना बाळाची त्वचा रगडू नका. हा उपाय नियमित केल्यास हळूहळू तुम्हाला बाळाच्या त्वचेमध्ये फरक दिसेल.
​साबणाचा वापर करू नका

बाळाच्या आंघोळीचा साबण केमिकलयुक्त नसावा. यामुळे बाळाची त्वचा रूक्ष होऊ शकते, त्वचेवर पुरळ येऊ शकतात किंवा त्वचेचे अन्य गंभीर आजार देखील होण्याची भीती असते. याऐवजी बाळासाठी तुम्ही घरातच उटणे तयार करा किंवा औषधी वनस्पतींद्वारे तयार करण्यात आलेले बॉडी पॅकनं बाळाला आंघोळ घालावी. पण अगदीचा तुम्हाला बाळाला साबण लावून आंघोळ घालावीशी वाटल्यास बाजारात लहान मुलांसाठी केमिकल फ्री किंवा ग्लिसरीन बेबी साबण मिळतात, त्यांचा वापर करा. या उत्पादनांमध्ये सोडियमचे प्रमाण कमी असल्यानं बाळाच्या नाजूक त्वचेवर परिणाम होत नाही.

​बाळाच्या त्वचेला मॉईश्चराइझर लावा
कोणत्याही वयोगटातील व्यक्तीचं त्वचेवर मॉईश्चराइझर (Moisturizer) लावणं गरजेचं आहे. लहान बाळांच्याही त्वचेवर मॉईश्चराइझर लावल्यास अनेक फायदे मिळतील. बाळाच्या त्वचेला नैसर्गिक ओलावा मिळाल्यानं त्वचा कोरडी होणार नाही. त्वचा कोरडी झाल्यास काळंवडण्याची शक्यता असते. त्यामुळे बाळाच्या नितळ आणि सुंदर त्वचेसाठी दिवसातून दोन ते तीन वेळा मॉईश्चराइझर क्रीम लावा. यापासून त्वचेला पोषकतत्त्वे मिळण्यास मदत होते. मॉईश्चराइझरमुळे बाळाची त्वचा मऊ राहण्यास आणि उजळण्यास मदत होते.

​कोमट तेलानं करा मसाज
बाळाच्या त्वचेचा रंग उजळण्यासाठी सर्वात चांगली पद्धत म्हणजे ऑलिव्ह ऑईल किंवा बदामाच्या तेलानं मसाज करणे. लहान मुलांना तेलानं मसाज केल्यास त्यांच्या त्वचेला पोषकतत्त्वे मिळतात आणि त्वचा मऊ राहण्यासही मदत होते.

असा करा तेल मसाज

- मंद आचेवर तेल गरम करत ठेवा. तेल उकळू नका, ते कोमट असावं.

- बाळाला तेल लावण्यापूर्वी पहिल्यांदा तेलाचं तापमान तपासून घ्या. कारण बाळाला चटका बसता कामा नये.

- यानंतर बाळाच्या अंगाला तेल लावून हलक्या बोटांनी मसाज करा.

- यामुळे तेल बाळाच्या त्वचेमध्ये खोलवर मुरते आणि त्वचेचा पोत, रंग सुधारण्यास मदत होते. नारळाच्या तेलानंही बाळाच्या शरीराला मसाज करू शकता.

​बाळाच्या त्वचेसाठी कोवळे ऊन लाभदायक
सकाळी सूर्याच्या कोवळ्या किरणांमध्ये आपल्या बाळासह फिरायला जा. कोवळ्या सूर्यप्रकाशातून बाळाला व्हिटॅमिन डी मिळते, ज्यामुळे हाडे बळकट होतात आणि त्वचेच्या समस्यांपासून बाळाचं रक्षणही होते. पण अति कडक उन्हामध्ये बाळाला नेण्याची चूक करू नका. कारण यामुळे त्वचा सावळी किंवा काळंवडण्याची शक्यता असते. उन्हातून घरी आल्यानंतर काही तासांनी बाळाला कोमट पाण्यानं आंघोळ घाला. बाळाच्या त्वचेवर महागडी केमिकलयुक्त प्रोडक्ट वापरण्याऐवजी हे घरगुती उपचार करा. गरज वाटल्यास डॉक्टरांचाही सल्ला घ्या.