ताप किती असतो?

ताप म्हणजे ताप असतो, घरातील सगळ्य ांनाच मनस्ताप असतो. रुग्णासहित सगळ्यांनाच तापदायक असतो. घरात एखाद्याला जरी ताप भरला तरी सगळे घर त्याच्याभोवती भिर-भिरू लागते. सुचेल ते उपाय करू लागतात. आपण करत असलेल्या उपायांचा काहीच परिणाम होत नाही, असे जाणवल्यावर मग डॉक्टरांची शोधाशोध सुरू होते आणि मग रुग्णाला त्यांच्यापर्यंत पोहोचवले जाते.

तापाचे अनेकानेक प्रकार असतात, त्याची लक्षणे आणि उपाय याबाबत प्रत्येकाला ठळक माहिती या लेखाच्या माध्यमातून मी आपल्यापर्यंत पोहोचवत आहे.

ताप म्हणजे शरीराच्या एकूण तापमानात झालेली वाढ, जी शरीराच्या सामान्य (३७.२”c / ९८.६”c ) तापमानापेक्षा जास्त असते. शरीराचे स्थिर तापमान किती असते याबाबत जरी मत भिन्नता असली तरी वरील ३७.२”f किंवा ९८.६”f हि एक मर्यादा निश्चित केलेली आहे. त्यापेक्षा जास्त तापमान हे ताप म्हणून निश्चित केले आहे. सर्व सामान्यतः तापाचे मोजमाप हे काखेमध्ये, तोंडामध्ये, गुद्द्वार मध्ये केले जाते. या तापाची विभागणी ही त्याच्या तीव्रतेनुसार खालील प्रकारांमध्ये करण्यात आलेली आहे.

सलग ताप

या प्रकारच्या तापामध्ये आपल्या शरीराचे तापमान हे सलग स्थिर पातळीपेक्षा जास्त असते व साधारण १’c पेक्षा जास्त चढउतार होत नाही. या प्रकारच्या तापाचे उदाहरण द्यायचे झाल्यास लोबार न्युमोनिया, टायफॉइड, मेंदूज्वर, मूत्रमार्गाचे जंतुसंसर्ग

अधून-मधून खंडित येणारा ताप

या प्रकारच्या तापामध्ये शरीराचे तापमान हे ठराविक वेळेसाठी जास्त असते व नंतर पुन्हा ते सामान्य पातळीवर येते.

उदा. मलेरिया, काला आजार, सेप्टीसेमिया

या प्रकारच्या तापाला आणखी उपप्रकारात करता येते.

चोवीस तासानंतर येणारा ताप


ताप हा प्रत्येक २४ तासानंतर परत येतो. या प्रकाराचे प्रमुख लक्षण हे प्लाझमोडियम फॅल्सिपॅरममध्ये (मलेरिया) दिसते.

४८ तासानंतर येणारा ताप

हा ताप प्रत्येक ४८ तासानंतर परत येतो. उदा. प्लाझमोडियम वायवॅक्स. (मलेरिया)

७२ तासांच्या मुदतीचा ताप

या प्रकारात ताप हा प्रत्येक ७२ तासांनंतर परत येतो. उदा. प्लाझमोडियम मलेरी. (मलेरिया)

संसर्गजन्य ताप

या प्रकारामध्ये शरिराचे तापमान हे २४ तास जास्त राहते व १”c पेक्षा जास्त चढउतार येतो. उदा. इन्फेक्टिव एन्डोकारडायटिस (हृदयाच्या आतील आवरणाचे इन्फेक्शन)

न्युट्रेपेनिक ताप


हा ताप शरीराच्या रोग प्रतिबंधक संस्थेमध्ये बिघाड झाल्याने दिसून येतो. रोग प्रतिबंधक पांढऱ्या पेशींच्या कमतरतेमुळे जीवाणूंचा प्रादुर्भाव अतिशय झपाट्याने होतो आणि म्हणूनच या प्रकारच्या तापासाठी तात्काळ वैद्यकीय सेवा लागते.

तापाचे प्रकार याबाबत थोडक्यात माहिती आपण जाणून घेतली आहे. ताप जरी भीतीदायक व त्रासदायक असला तरी काही अंशी ताप व शरीरास पुढे होणाऱ्या मोठ्या धोक्यापासून बचावात्मकही असतो. ताप ही शरीराची नैसर्गिक प्रतिक्रिया असते. शरीरामध्ये शिरकाव केलेल्या जीवाणू आणि विषाणूंना मारण्यासाठी म्हणूनच तापाच्या कारणांच्या शोध घेणे गरजेचे आहेच. परंतु, त्याचा बाऊ करणे किंवा भीती बाळगण्याचे कारण नाही.